John 7

Iesu Mulai Mumaisou Voxo Tila Noxi'a ta Iutaia sou Tani Alelaxu Tavuna Noxou Lataua

1 ^aXe ili'i, la Iesu ununalai no xalee lia tila ne Iutaia uasi. Xo ta tatila noxi'a ta Iutaia ilooxu sou lexe ivau. La sou Anu muxolu mo muxixaoxao no nano no xalee lia tila ne Xalilaiasi. 2 ^bIo, voxo tila noxi'a ta Iutaia misosovosou voxo e ta totoxosi'a mixolu no tani alelaxu tavuna noxou Lataua no xalee lia vitanisi, muxali 'alai. 3La Iesu ta vimovimou mivikalanu aloxo 'o, “Mamu nini naxolu lai 'o, nalai nuna no xalee lia tila ne Iutaia mo sou ta molomolomeni imaisou sosovo se'i nini na'oxonu. 4Nini naxali lamana no ie'i ta mitema, la mii ma'ia na'oxonu ne, natalumeu uasi. Napala'alixu mo ta mitema tavu'alo imaisine.” 5 ^cXo ta vimovimou kalumo imulaxu tane'i noxou uasi. 6La sou Iesu muvikalane'i aloxo 'o, “Voxo noxilo a uxali uao. Ia voxovoxo ne, ngingi nga'angingisi. 7Ta mitema no lia 'o imasaxainge, ia imasaxailo uasi. Xo eni apala'alixu 'ili'ilixo masumasua ane ane'i i'oxo'oxonu. 8Ngingi ngalai no anu voxo tila ne. Ia eni umomomo sou alai uasi. Xo voxo noxilo uxali uao.” 9La sou Anu muxolu ne Xalilaia.

10Ta vimovimou milutu la milai sou voxo tila ne. Ili'i la anu Iesu mumuline'i mulai, ia upala'a noxi'a ta mitema uasi. Mutalumesi. 11No anu voxo tila ne, la ta tatila noxi'a ta Iutaia imaisou Iesu iou uasi, la mitali'isi'a ta mitema lexe Anu a uxolu ne'ei? 12Ta mitema tavu'alo imunumunu noxi'a ngato'o sou Iesu. Se'i ivikala lexe Anu itema laixe, xe se'i ivikala lexe Anu ukalakalavoine'i ta mitema. 13Ia ane'i ta mitema ivikala tatila uasi. Xo mi'ume'a ta tatila noxi'a ta Iutaia.

14No nixi no anu voxo tila noxi'a ta Iutaia, la Iesu mu'unalai no nano no taasou lalotu noxou Lataua sou musokou mulosi'a ta mitema lavulavu. 15 ^dTa tatila noxi'a ta Iutaia milomusou vaikala noxou Iesu, la mikuluke la mitali'i aloxo 'o, “Itema ano 'o uvivikala loxo 'o xo mulai muno'u lavulavu ne'ei?” 16 ^eIesu mukoline'i aloxo 'o, “Lavulavu e eni elosi'a ta mitema ne, anu noxilo uasi. Anu molu noxou ane mupalusilo ene'e. 17Lexe vile umulinu masaxa noxou Lataua, la anu ulavusou lexe lavulavu noxilo molu noxou Lataua 'o molu noxilosi. 18 ^fAnu ane uvikala no anu lavulavu noxousi, la anu umasaxa lexe ta mitema i'itinu ualasou. Ia anu ane umasaxa lexe u'itinu ualasou ane mupalusou une'e 'o, anu uvikala manina mo ukalavoi uasi. 19 ^gMosesi mulosinge lapuloto noxou ne. Ia evile noxinge umulinu lapuloto ne uasi. Ia tava'u loxovaa la ngingi ngavelo asoli?” 20 ^hAne'i mikolinu vaikala noxou aloxo 'o, “Uleenu vile masua a muxolu noxine! 'Ei umasaxa lexe uvene?” 21Iesu mukoline'i aloxo 'o, “Eni e'oxonu xaixai ma'ia tila ne, la sou ngingi ngexavutala piena no anu 'o. 22 ⁱMosesi mulosinge vote'isou xooxoo ungasi'a ta molomolo. Ia anu molu noxou Mosesi uasi, molu noxi'a ta totoxosinge. La sou ngingi ngamuli lapuloto noxou sou xooxoo ungasi'a ta molomolo no voxo tavuna. 23 ^jNgingi ngavikala lexe ngamulinu lapuloto noxou Mosesi sou xooxoo ungasi'a ta molomolo, la ngingi nga'oxonu no voxo tavuna kalumo. Ia loxovaa la eni epamaulinu itema no voxo tavuna kalumo, la ngingi la'iangenge o? 24Iengi umaisou itemasi ka ngavikala lexe itema anu laixe uasi la anu masua aloxo 'o uasi. Ngalavusou itema laixe ukalu, la sou ngavikala lexe anu itema laixe uasi la anu masua.”

Ane'i ta Mitema Mimasaxa Lexe Ilavusou Iesu Anu 'Ei Manina

25Io, ta mitema se'i ne Ielusalemu milomusou vaikala noxou Iesu, la mivikala lexe, “Anu itema ane ta mitema imasaxa lexe ivau 'ole ane? 26Anu ane uvivikalane'i ane'i tavu'alo ne, ia ane'i ilea vaikala vile noxou uasi. Ta tatila noxi'a ta Iutaia, male ilavusou lexe Anu Kalisito uasi? 27 ^kIa nenge telavusou itema ne mo telavusou tualasou. Ia lexe Kalisito uxali, la evile umomomosou ulavusou lexe anu molu ne'ei uasi.” 28 ^lIesu uao ulolosi'a ta mitema lavulavu no nano no taasou lalotu tatila noxou Lataua. Muavuti la mu'ava aloxo 'o, “Manina, ngingi ngelavusilo mo ngelavusou tualasilo. Ia eni ane'e 'o no anu masaxa noxilo uasi. Eni ene'e no anu masaxa noxou ane mupalusilo. Anu ne manina. Ngingi ngalavusou itema ane ne uasi. 29Ia enisi elavusou. Xo eni melo noxou mo anu mupalusilo ene'e.” 30 ^mNo anu vaivaikala noxou ne, la ane'i mitovonu lexe itetelisou, ia evile utetelisou uasi. Xo voxo noxou a uxali uao. 31Ta mitema tavu'alo mimulaxu tane'i noxou la imunumunu sou ivikala aloxo 'o, “Lexe Kalisito uxali la male anu u'oxonu sosovo se'i uaulixu sosovo noxou itema 'o?”

Ta Mitema Mipalusi'a ta Mitema sou Isaxila'u Tani Tila Noxou Lataua sou Itetelisou Iesu

32Ta Palisaio mixolu no taiine'i ta mitema la milomusi'a mimunumunusou Iesu. La sou ane'i ta tatilasi'a ta mitema sou i'elaxa'a ta sipsip ilo'a ta Palisaio mipalusi'a ta mitema sou isaxila'u tani tila noxou Lataua sou lexe ilai itetelisou. 33La Iesu muavuti la muvikalane'i aloxo 'o, “Nenge nenge'a taxolu maxuvee uasi. Xo eni alivu alai noxou anu ane mupalusilo ene'e. 34 ⁿNgingi ngakakamulileli la ngaxalisilo uasi mo umomomo sou ngingi ngane'e no tuala e eni alai no anu uasi.” 35Ta tatila noxi'a ta Iutaia milomu aloxo ne, la mivikalane'i ngato'o aloxo 'o, “Itema 'o umasaxa lexe ulai ne'ei, la sou nenge tamaisou uasi o. Loxovaa anu ulai noxi'a ta mineminenge se'i mi'ume la milai mixolu no tuala tila ne Elenasi ▼

▼7:35Elenasi ne ane'i ta mitema ta Xiliki.

sou ulosi'a lavulavu? 36La sou Anu muvikala lexe, ‘Ngingi ngakakamulileli, la ngaxalisilo uasi,’ mo ‘Umomomo sou ngingi ngane'e no tuala e eni alai no anu uasi.’ Ia laaxu vaikala noxou ne a loxovaa?”

Iesu Anu Mulemo Lexa sou Mauli

37 ^pNo anu voxo kaluxu sou voxo tila noxi'a ta Iutaia, la anu Iesu mutulu mo mu'ava tila aloxo 'o, “'Ei ane usoliu lexa, la une'e noxilo mo uie. 38 ^q'Ei ane umulaxu tanu noxilo, la lexa sou mauli usiali no nano no tanu loxo Lavuku Tavuna teinu mulemolu.” 39 ^rLexa sou mauli ne, anu Uleenu Tavuna e 'ei ane umulaxu tanu noxou Iesu, la anu uno'u ili'i. Xo no voxo ane ne, la Iesu ulivu ulai noxou Momu teitexi no opo loxotolo uao. La sou Lataua upalusou Uleenu Tavuna ulu'e uasi.

Ta Mitema Mikalipala Mixali Laoluxa'a Tamei

40 ^sTa mitema milomusou vaikala noxou Iesu la se'i mivikala aloxo 'o, “Manina. Itema 'o Anu itema sou palomatana e Lataua mupalusou mulu'e no lia 'o 'a,” 41 ^tia se'i mivikala aloxo 'o, “Anu Kalisito.” Xe se'i mivikala aloxo 'o, “Kalisito ne, umomomo sou uxali ne Xalilaia uasi. 42 ^uXo Lavuku Tavuna muvikala lexe Kalisito uxali noxi'a Deviti ta 'ilu'ilusunu mo uxali ne Vetiliemu e Deviti muxolu no anu tei.” 43La sou xavutalai'a muxali iouiou noxou Iesu la ane'i mikalipala. 44Mose'i mimasaxa lexe itetelisou Iesu, ia evile sou utetelisou uasi.

Ta Tatilasi'a Imulaxu Tane'i Noxou Iesu Uasi

45Ili'i la ta mitema sou isaxila'u tani tila noxou Lataua milivu mixali noxi'a ta tatilasi'a ta mitema sou i'elaxa'a ta sipsip ilo'a ta Palisaio. La ane'i mitali'isi'a aloxo 'o, “Loxovaa la ngano'u itema ne une'e ua?” 46 ^vAne'i ta mitema sou isaxila'u tani tila noxou Lataua mikoline'i aloxo, “Evile uvivikala aloxo itema 'o tatei uasi.” 47Ta Palisaio milomu aloxo ne, la mivikalane'i aloxo 'o, “Itema ne mukalavoingengi kalumo ne? 48 ^wNgemaisixe nexi ta tatilasinge mo ta Palisaio o temulaxu tanexi noxou? Uasi manina. 49Ane'i tavu'alo mipita ne ilavusou lapuloto noxou Mosesi uasi. La sou Lataua u'oxo masuane'i ne.” 50 ^xIo, vile noxi'a ualasou lexe Nikodimo anu itema e mune'e noxou Iesu tei muvikalane'i aloxo 'o, 51“No anu lapuloto noxinge, la umomomo sou tatulusou itema vile no anu vaivaikala vitanisi uasi. Talomu noxou laixe mo talavusou mii ma'ia ane anu mu'oxonu, la sou tatulusou no anu vaivaikala.” 52 ^yAne'i miavuti la mivikalanu aloxo 'o, “Male nini sie Xalilaia kalumo? Namalei laixe no anu Lavuku Tavuna, la sou nini nalavusou lexe itema sou palomatana vile uxali ne Xalilaia uasi.” 53Aloxo ne, la sou ane'i milivulivu no taataasi'a.